पिकांना फटका बसण्याची शक्यता; पंचनामे व आवश्यक उपाययोजनांची मागणी
बाळसमुद्र, ता. सिंदखेड राजा : बाळसमुद्र परिसरात पावसाचे प्रमाण अपेक्षेप्रमाणे न झाल्याने शेतकरी चिंतेत आहेत. पावसाअभावी जमिनीतील ओलावा कमी होत असून खरीप पिकांच्या वाढीवर परिणाम होण्याची शक्यता आहे. पिकांना वेळेत पाऊस न मिळाल्यास उत्पादनात घट होण्याची भीती शेतकऱ्यांकडून व्यक्त केली जात आहे.
शेतीसाठी झालेला खर्च आणि पिकांची सद्यस्थिती पाहता आगामी काळात आर्थिक अडचणी वाढण्याची शक्यता आहे. त्यामुळे प्रशासनाने परिसरातील पीक परिस्थितीची प्रत्यक्ष पाहणी करून आवश्यक त्या उपाययोजना कराव्यात, अशी मागणी शेतकऱ्यांनी केली आहे.
प्रशासनाकडे मागण्या
पिकांच्या नुकसानीचा वस्तुनिष्ठ आढावा घेऊन आवश्यकतेनुसार पीक नुकसानीचे पंचनामे करावेत, तसेच पात्र शेतकऱ्यांना नियमानुसार पीकविमा व शासकीय नुकसानभरपाईचा लाभ मिळवून द्यावा, अशी मागणी करण्यात आली आहे. पाणीटंचाईची परिस्थिती निर्माण झाल्यास पिण्याचे पाणी व जनावरांसाठी पाण्याची उपलब्धता सुनिश्चित करावी, अशीही मागणी आहे.
तसेच परिस्थितीचा आढावा घेऊन शासनाच्या निकषांनुसार दुष्काळी उपाययोजना लागू कराव्यात, अशी अपेक्षा शेतकऱ्यांनी व्यक्त केली आहे. प्रशासनाकडून वस्तुस्थितीची पाहणी करून योग्य निर्णय घेतला जाण्याची प्रतीक्षा ग्रामस्थांना आहे.
प्रतिनिधी : प्रशांत वि. साळवे
सारथी महाराष्ट्र न्यूज
