पोलादपूर : पोलादपूर नगरपंचायतीच्या हद्दीतील विविध नगरांमध्ये, प्रमुख रस्त्यांवर तसेच महत्त्वाच्या ठिकाणी बसविण्यात आलेले काही सीसीटीव्ही कॅमेरे मागील आठ ते नऊ महिन्यांपासून बंद असल्याचा मुद्दा उपस्थित करत ते तातडीने दुरुस्त करून कार्यान्वित करण्यात यावेत, या मागणीसाठी भाजपच्या वतीने नगरपंचायत प्रशासनाला निवेदन देण्यात आले.
यावेळी भाजपा पोलादपूर शहराध्यक्ष महेश निकम, तालुका सरचिटणीस आशुतोष दरेकर, तालुका उपाध्यक्ष राजेश कदम, युवा मोर्चा जिल्हा उपाध्यक्ष दर्पण दरेकर, तालुका कोषाध्यक्ष राजेश सपकाळ, युवा मोर्चा तालुकाध्यक्ष सनी जाधव तसेच नरेश शेलार उपस्थित होते.
यावेळी नगरपंचायत प्रशासनाच्या निदर्शनास आणून देण्यात आले की, शहरातील अनेक सीसीटीव्ही कॅमेरे दीर्घकाळापासून बंद आहेत. यावर प्रशासनाच्या वतीने सीसीटीव्ही कॅमेऱ्यांच्या देखभालीसाठी मनुष्यबळ उपलब्ध नसल्याचे सांगण्यात आले.
यावर युवा मोर्चा जिल्हा उपाध्यक्ष दर्पण दरेकर यांनी, “मेंटेनन्स करण्यासाठी माणूस उपलब्ध नसेल तर आम्ही भीक मागून आंदोलन करू आणि तुमचा मेंटेनन्सचा खर्च करू,” अशी भूमिका मांडली. त्यावर प्रशासनाने आंदोलन करू नये, आपली समस्या लवकरात लवकर सोडविण्यात येईल, असे आश्वासन दिले.
यावेळी भाजपा शहराध्यक्ष महेश निकम यांनी, “गेल्या आठ ते नऊ महिन्यांपासून सीसीटीव्ही कॅमेरे बंद आहेत. नागरिकांकडून विविध प्रकारचे कर घेतले जातात. नागरिकांच्या पैशातून उभारण्यात आलेली यंत्रणा नागरिकांच्या उपयोगाची ठरत नसेल तर कर घेण्याचा उद्देश काय?” असा सवाल उपस्थित केला.
तसेच भविष्यात शहरात चोरी, भांडण, अपघात किंवा अन्य कोणतीही अनुचित घटना घडल्यास सीसीटीव्ही फुटेजच्या माध्यमातून घटनेचा तपास करण्यास मदत मिळते. मात्र कॅमेरे बंद असल्यास अशा घटनांची माहिती व पुरावे मिळविण्यात अडचणी निर्माण होऊ शकतात, असेही यावेळी निदर्शनास आणून देण्यात आले.
नागरिकांच्या सुरक्षिततेच्या दृष्टीने शहरातील सर्व सीसीटीव्ही कॅमेरे तातडीने दुरुस्त करून कार्यान्वित करावेत, अशी मागणी यावेळी करण्यात आली. तसेच भविष्यात सीसीटीव्ही यंत्रणा बंद असल्यामुळे एखादी अनुचित घटना घडल्यास त्याची प्रशासकीय जबाबदारी नगरपंचायत प्रशासनाची राहील, असा इशाराही देण्यात आला.
नगरपंचायत प्रशासनाने बंद असलेले सीसीटीव्ही कॅमेरे लवकरात लवकर सुरू करण्याचे आश्वासन दिले.
