कोल्हापुरात किसान सभेच्या २४व्या महाराष्ट्र राज्य अधिवेशनाचा दुसरा दिवस उत्साहात

शेतकरी, आदिवासी आणि ग्रामीण प्रश्नांवर पदाधिकाऱ्यांची सविस्तर मांडणी
कोल्हापूर, दि. ७ ऑक्टोबर २०२६ : अखिल भारतीय किसान सभेच्या २४व्या महाराष्ट्र राज्य अधिवेशनाचा दुसरा दिवस कोल्हापूर येथे उत्साहपूर्ण वातावरणात पार पडला. दि. ६ ते ८ ऑक्टोबरदरम्यान सुरू असलेल्या या अधिवेशनात राज्यभरातून किसान सभा पदाधिकारी, कार्यकर्ते व प्रतिनिधी सहभागी झाले आहेत. अधिवेशनात शेतकरी आणि ग्रामीण भागातील विविध प्रश्नांवर सविस्तर चर्चा होत आहे.
दुसऱ्या दिवशी झालेल्या अधिवेशनाच्या चर्चासत्रात कोल्हापूरचे आमदार सतेज पाटील, तलासरीचे आमदार विनोद निकोले, माजी आमदार जे. पी. गावित, किसान सभेचे राष्ट्रीय अध्यक्ष डॉ. अशोक ढवळे, डॉ. अजित नवले तसेच कॉ. इंद्रजीत गावित यांच्यासह विविध पदाधिकाऱ्यांनी आपापली मते व प्रश्न अधिवेशनात मांडले.

यावेळी शेतकऱ्यांच्या शेतीमालाला योग्य दर, वाढता उत्पादन खर्च, सिंचन व पाणीप्रश्न, शेतकऱ्यांचे कर्ज, वनहक्क व आदिवासींचे प्रश्न, रोजगार तसेच ग्रामीण भागातील मूलभूत सुविधा अशा विविध विषयांवर चर्चा करण्यात आली. शेतकऱ्यांच्या प्रश्नांची राज्य व राष्ट्रीय पातळीवर प्रभावीपणे मांडणी करण्यासाठी पुढील काळातील संघटनात्मक कार्यक्रम आणि आंदोलनाची दिशा यावरही विचारमंथन करण्यात आले.
अधिवेशनाच्या माध्यमातून महाराष्ट्रातील विविध जिल्ह्यांमधील शेतकरी प्रश्न एकत्रितपणे मांडण्याचा प्रयत्न होत असून, स्थानिक पातळीवरील प्रश्न शासनाच्या निदर्शनास आणून देण्यावर प्रतिनिधींनी भर दिला. किसान सभेच्या २४व्या राज्य अधिवेशनात राज्यभरातील प्रतिनिधी सहभागी झाल्याचे यापूर्वी जाहीर करण्यात आले होते.

दुसऱ्या दिवसाच्या सत्रात विविध पदाधिकाऱ्यांनी केलेल्या मांडणीमुळे अधिवेशनातील चर्चेला व्यापक स्वरूप प्राप्त झाले. शेतकरी, शेतमजूर, आदिवासी आणि ग्रामीण जनतेच्या प्रश्नांवर संघटितपणे पुढील दिशा ठरविण्याच्या दृष्टीने हे अधिवेशन महत्त्वाचे ठरत आहे.
वंदे महाराष्ट्र टीव्ही मीडिया —सटाणा प्रतिनिधी : राहुल सूर्यवंशी,
संपर्क : 7507727263