प्रशासनाला आंदोलनाचा इशारा
दोडामार्ग
झरे-२ येथील ख्रिस्ती बांधवांनी आपल्या विविध प्रलंबित मागण्यांसाठी ग्रामपंचायत कार्यालयासमोर सुरू केलेले बेमुदत उपोषण आज चौथ्या दिवशीही कायम असून आंदोलन अधिक तीव्र झाले आहे. वारंवार आश्वासने देऊनही प्रशासनाकडून कोणतीही ठोस कार्यवाही होत नसल्याने आंदोलकांनी तीव्र नाराजी व्यक्त केली आहे. याच पार्श्वभूमीवर उद्या शनिवार, दि. ४ जुलै २०२६ पासून वाडीतील महिलांनी साखळी उपोषण सुरू करण्याचा निर्णय घेतला आहे.
ख्रिस्ती बांधवांच्या प्रमुख मागण्यांमध्ये ख्रिश्चन वाडी ते झरे-२ दरम्यानचा पुनर्वसन विभागाचा जुना रस्ता तातडीने खुला करणे, पुनर्वसन परिसरातील कथित बेकायदेशीर जमीन व्यवहारांची सखोल चौकशी करणे, हक्काची नुकसानभरपाई देणे तसेच परिसरातील अतिक्रमणे हटविणे या मागण्यांचा समावेश आहे. मात्र, प्रशासनाकडून केवळ आश्वासनांची पूर्तता होत असून प्रत्यक्षात कोणतीही ठोस पावले उचलली जात नसल्याचा आरोप आंदोलकांनी केला आहे.
चार दिवसांपासून सुरू असलेल्या या उपोषणामुळे उपोषणकर्त्यांची प्रकृती खालावत चालली आहे. तरीदेखील संबंधित प्रांत अधिकाऱ्यांनी अद्याप आंदोलनस्थळी भेट दिलेली नसल्याने ग्रामस्थांमध्ये संतापाचे वातावरण निर्माण झाले आहे. प्रशासनाच्या या भूमिकेबद्दल ख्रिस्ती बांधवांसह परिसरातील ग्रामस्थांनी तीव्र नाराजी व्यक्त केली आहे.
दरम्यान, मागण्यांची प्रत्यक्ष अंमलबजावणी होईपर्यंत आंदोलन मागे घेणार नसल्याचा निर्धार ग्रामस्थांनी व्यक्त केला आहे. उद्यापासून महिलादेखील आंदोलनात सहभागी होत साखळी उपोषण करणार असल्याने आंदोलन आणखी तीव्र होण्याची शक्यता आहे.
आंदोलनादरम्यान कायदा व सुव्यवस्थेचा प्रश्न निर्माण झाल्यास किंवा उपोषणकर्त्यांच्या आरोग्याला धोका निर्माण झाल्यास त्यास प्रशासन जबाबदार राहील, असा इशारा देणारे निवेदन तहसीलदारांना देण्यात आले आहे. या प्रकरणात प्रशासनाने तातडीने मध्यस्थी करून तोडगा काढावा, अशी मागणी झरे-२ येथील ख्रिस्ती बांधव व ग्रामस्थांकडून करण्यात येत आहे.
